|
عشرة أعوام بالتمام والكمال هي العمر الفني للمخرج والمونتير خالد مرعي..
عشرة أعوام أثبت مرعي خلالها أنه جدير بثقة كل المخرجين الكبار الذين تعاون
معهم كمونتير، وبثقة كل النجوم الذين تحمسوا له فيما بعد كمخرج.. لم يتعامل
يوماً مع مهنة المونتاج علي أنها مرحلة وهتعدي، بل عاد بعد أن احترف
الإخراج ليعمل مرة أخري تحت قيادة مخرج آخر وهو مروان حامد في فيلم
«إبراهيم الأبيض» حيث عاد ليكتب اسمه علي الأفيشات في خانة المونتير..
أفلامه تحمل اختلافاً في نوعياتها لكنها تتفق علي حس فني عال يميز العلامات
الفنية الثلاث التي قدمها كمخرج وهي «تيمور وشفيقة» و«آسف علي الإزعاج»
و«عسل إسود» والتي قدم نفسه من خلالها كواحد من أهم المخرجين الموجودين علي
الساحة الفنية حالياً تماماً كما قدم نفسه من قبل كواحد من أهم المونتيرين
علي الساحة الفنية..التقينا خالد مرعي بعد عرض أحدث أفلامه «عسل إسود» الذي
حمل اسمه كمخرج ومونتير في الوقت نفسه لنتحدث معه عن رؤيته للتجربة
الجديدة..
·
لماذا كنت حريصاً علي صنع حالة
من التوازن بين النصف الأول من الفيلم والنصف الثاني وكأنك تقيس الأمر
بالميزان وهي الحسابات التي قد تفسد المشاهدة علي المتفرج في بعض الأحيان؟
- بالتأكيد لم أقصد أني أبوظ إحساس حد بمشاهدة الفيلم ولا أتصور أن النقلة
كانت حادة جداً لكن الفكرة كلها أنه كان عايش في النصف الأول من الفيلم فوق
السطح ثم نزل وعاش بين الناس في النصف الثاني من الفيلم.
·
ألم تخش الاتهامات من نوعية أن
الفيلم يشوه سمعة مصر؟
- لا لم أفكر في هذه الاتهامات كل ما كان يشغلني هو تقديم فيلم يجيب عن
سؤال رغم كل ما نعانيه في هذا البلد ليه الواحد أما بيسافر بره مصر بيبقي
عايز يرجع بسرعة، يمكن علشان إحنا ارتبطنا في البلد دي بحاجات معينة خلتنا
نحبها، لذلك الشباب الصغيرين حبوا الفيلم وتفاعلوا معه.
·
هل تتصور أن فيلم «عسل إسود» من
الممكن أن يصنع نقلة فكرية بين الشباب؟
- مش لازم نقلة بس علي الأقل يخليهم يفكروا من جديد في حالهم وفي حال
البلد.. واحد معاه مليارات ما يستثمرها في مصر بدل ما يسافر.
·
هل تتصور أن رجوع المصريين
لبلدهم بسبب اشتياقهم للبلد نفسه أم للناس؟
- ما البلد هي الناس طبعا هناك الأرض والرملة لكن ده جزء من حاجات كتير
بتخلي الناس ترتبط عاطفيا بالبلد.
·
هل كان رجوع البطل لمصر في نهاية
الفيلم هدفه إرضاء الجمهور أم لأنك تري أن هذه هي النهاية الأصدق بالفعل؟
- أنا مصدق النهاية دي جداً لأن أنا شخصياً بيجيلي حنين للبلد أما بسافر
وبعدين هي نهاية ليست محددة هو رجع آه بس ماحدش عارف هيقعد قد إيه ولا
هيرجع تاني ولا لأ، وهي نهاية تجعلك تسأل نفسك سؤال واحد الراجل ده رجع
ليه؟ لو لقيتي إجابة يبقي الفيلم نجح في توصيل رسالته، ولو ما كنش رجع يبقي
أنا بقول للناس البلد دي خلاص ماعدش ينفع يتعاش فيها ودي تبقي كارثة.
·
بنسبة كم بالمائة نجحت في نقل
صورة صادقة عن الواقع المصري؟
- بنسبة عشرة في المية لأن الواقع صعب قوي، لو نقلناه زي ما هو نبقي بنحطم
نفسنا بنفسنا.
·
هل أنت مع السينما الصادمة أم مع
تغييب الناس عن همومها؟
-إحنا ممكن نعمل فيلم صادم وممكن نعمل فيلم ليس صادم التنوع مهم جداً.
·
يتردد أن أحمد حلمي يتدخل في كل
تفاصيل الفيلم الذي يقوم ببطولته.. لكن هل يقوم بفرض رأيه علي المخرج أثناء
التصوير؟
- أحمد لديه ثقافة عامة أحب أن أستفيد منها وأستمع لرأيه فهو لا يفرض رأيه
لكن أنا اللي بسأله لأنه بيقدر يفصل تماما بين كونه بطل للعمل وبين كونه
يبدي رأيه في العمل ككل. ساعات بقنعه وبيقنعني، وفي النهاية نتفق علي شكل
معين.
·
قدمت ثلاثة أفلام مختلفة تماماً
«لايت كوميدي» ثم «نفسي» ثم فيلم «كوميديا سوداء».. ما معيار اختيارك
للأفلام؟
- أنا عايز أجرب كل حاجة، حتي دخولي مجال الإخراج نفسه كان من باب تجربة،
أنا جالي عرض كويس فقلت أجرب مكنتش قاعد مستني الإخراج.. المعيار هو
السيناريو نفسه.
·
لأول مرة منذ سنوات طويلة نشاهد
فيلماً مصرياً يقدم صدمة ويتناول حياة العشوائيات بهذا الشكل دون فجاجة
بعكس أفلام أخري تتناول العشوائيات بفجاجة شديدة؟
- الفجاجة في الفن شيء ليس مطلوب واللي بيصدقها الناس اللي عاشت فيها فقط
أما باقي الجمهور فلا يصدقها.
·
رغم أن بدايتك كانت فنية بحتة من
خلال فيلم «جنة الشياطين» الذي عملت خلاله كمونتير للمرة الأولي فإن
التجارب التي قدمتها كلها كانت تجارب جماهيرية؟
- «جنة الشياطين» ليس جماهيرياً فعلا والنوع ده من الأفلام بطل شوية، كذلك
يجب أن تحتوي السينما علي جزء تجاري مش لازم الجانب الفلسفي يبقي طاغي علي
كل شيء. عنصر الإمتاع مهم جداً.
·
هل تشعر أنك حققت شيئا ما في
الإخراج لم تحققه كمونتير؟
- أصبحت قادراً علي التعبير عن وجهة نظري بعد أن أصبحت مخرجاً، بالإضافة
لفن قيادة الممثل التي أصبحت أمارسه عندما أصبحت مخرجاً.
·
من الذي شجعك علي دخول تجربة
الإخراج للمرة الأولي؟
- أحمد السقا وتامر حبيب في فيلم «تيمور وشفيقة».
·
ما الذي جذبك في سيناريو «تيمور
وشفيقة» وجعلك ترغب في دخول مجال الإخراج للمرة الأولي ومن بعده «آسف علي
الإزعاج» ثم «عسل إسود»؟
- أنا عاشق للأفلام الأبيض وأسود علي قد ما هي تعتمد في بعض الأحيان علي
فكرة ساذجة بقدر ما تحمل قدراً كبيراً من الإمتاع. وهي المعادلة التي حاولت
تحقيقها في الفيلمين التاليين ففيلم «عسل إسود» مثلاً بقدر ما يحمل من
بساطة بقدر ما يحمل من تعقيد.
·
ما الفيلم الأصعب في تنفيذه
بالنسبة لك بين أفلامك الثلاثة ؟
- سيناريو «آسف علي الإزعاج» كان الأصعب لأنه بيتكلم عن حالة نفسية والكلام
عن أي حالة نفسية بيبقي حساس جداً وعايز مذاكرة وكمان كان في حاجات مستخبية
في السيناريو يجب التعامل معها بطريقة مختلفة، أما علي مستوي الإخراج ففيلم
«عسل إسود» كان هو الأصعب لأن قماشته واسعة بالإضافة إلي أن معظم مشاهده تم
تصويرها في الشارع والناس معذورة في ناس جاية تعطلهم.
·
قدمت في فيلميك الأول والثاني
شرائح من الطبقة المتوسطة وتعد هذه هي المرة التي تناقش فيها هماً حقيقياً
للمصريين.. كيف استطعت أن تلم بتفاصيل حياتهم وأي الأفلام الثلاثة الأقرب
إليك؟
- أنا من الطبقة المتوسطة ولست بعيداً عنها لكن المخرج الشاطر اللي يعرف
تفاصيل حياة كل الطبقات، وليس الطبقة التي ينتمي لها فقط، أنا بشوف الناس
دي في الحياة ممكن يبقي جار أو قريب وممكن يبقي أنا.
·
هل تفضل الأفلام الكوميدية عن
غيرها من الأفلام؟
- أفضل الأعمال الكوميدية لأنها أسهل في الوصول للناس
الدستور المصرية في
19/06/2010
زينة:
بعد «بنتين من مصر» اكتشفت إن الأفلام ممكن تغير الناس
عبير عبد الوهاب
مع بداية
المشاهد الأولي من فيلم «بنتين من مصر» سوف تتخيل للحظات أن بطلة الفيلم
التي تتحرك أمامك علي الشاشة، هي ممثلة أخري غير تلك الفنانة المكتوب اسمها
علي تيترات الفيلم، والموجودة صورتها علي أفيشاته.. ستكتشف أنك أمام ممثلة
من العيار الثقيل، لديها طاقات تمثيلية لا حدود لها، أنت هنا لا تشاهد
«زينة» الممثلة التي قدمت من قبل أدواراً مختلفة ومتنوعة، ما بين
الرومانسية والكوميدية والتراجيدية، أجادت في تجسيد بعضها، وكان هناك
ملاحظات علي أدائها للبعض الآخر.
أنت هنا
أمام ممثلة حقيقية، استطاعت بمهارة شديدة أن تحول شخصية «حنان» إلي «بنت
مصرية» من لحم ودم، تلك الفتاه العانس التي تجاوزت الثلاثين من عمرها ولم
ترتبط بأي رجل في حياتها.. تلك الفتاة التي تعاني من مختلف أشكال القهر
والظلم، وتشعر بطعم المرارة في كل مواقف حياتها، حولتها زينة إلي فتاة
تنفعل بصدق، فينفعل معها المشاهد بكل حواسه.. وتبكي فيبكي معها المشاهد
بحرقة، بعد أن تعاطف معها ومع مشاكلها وأزماتها.. استطاعت زينة أن تثبت
للجمهور أنها ممثلة «بجد» لديها طاقات دفينة، فقط تحتاج لأقرب فرصة لتعلن
عن نفسها..
·
ما الذي حمسك للموافقة علي سيناريو فيلم
«بنتين من مصر»؟
- لقد
عُرض عليَّ السيناريو منذ حوالي عام، فبدأت في قراءته في نفس اليوم الذي
وصلني فيه السيناريو للمرة الأولي في حياتي، وللمرة الأولي أيضاً لم أتحرك
من مكاني إلا بعد أن انتهيت من قراءته، فقد بدأت في القراءة في الحادية
عشرة مساءً تقريباً وانتهيت منه قبل أذان الفجر بقليل، ولقيت نفسي قاعدة
أعيط وأنا بقرأ، واتصلت بمحمد أمين مؤلف الفيلم ومخرجه لقيته بيصلي الفجر
استنيته وقلت له إن أنا موافقة جداً علي الفيلم ده.. أصل ده فيلم كل حاجة
فيه حلوة، مؤلف ومخرج كبير ومختلف، وشركة إنتاج محترمة، وفريق عمل مهم، ده
بجد فيلم مفيهوش غلطة، وبصراحة كده ماكنش هيبقي ليّ حجة لو رفضته عشان كده
الاختيارات قدامي وقتها كانت بين «آه» و«آه» مش بين «آه» و«لأ».
·
لكن ايراداته ليست مضمونة؟
- ايرادات
ايه؟ وانا اما اعمل فيلم مهم زي ده هتبقي عيني علي الإيرادات؟ الحمد لله إن
أنا معايا شركة إنتاج فاهمة إنها بتعمل فيلم مهم بغض النظر عن الفلوس اللي
هيجيبها، طبعاً يبقي شيء كويس لو الفيلم جاب إيرادات وأنا نفسي كل بنات مصر
تخش الفيلم لكن لو مجابش فلوس مش هزعل.
·
بعض بنات جيلك يفكرن بطريقة أن البطولة
الأولي للفنانة ترسخ اسمها لدي المنتجين، وإما أن تجعلهم يتعاملون معها علي
اعتبار أنها نجمة شباك فيتحمسون لإنتاج تجارب جديدة لها أو لا؟
- عمري ما
فكرت بهذه الطريقة. طيب مانا اتعرضت عليّ بطولة أفلام كوميدية تافهة كتير
بس أنا كنت برفض لأني مش عايزة أعمل فيلم بطولتي عشان أبقي بطلة اسمي بيشيل
فيلم «واقع» يا فرحتي أنا ممكن أعمل ده مع الممثلين الشباب، أشاركهم بطولة
أفلام كوميدية بعضها تافهة يشيلوها هما أنا مليش دعوة، إنما أما أفكر أعمل
فيلم بطولتي لازم يبقي فيلم مهم. وبعدين المنتجين عارفين إن أنا اسمي بيجيب
فلوس، ماهم بيجيبوني مع النجوم الشباب وعارفين.
·
ظهرت في الفيلم كما لم تظهري من قبل وكأنك
تخرجين لأول مرة طاقات تمثيلية دفينة؟
- طبعاً
دي حاجة تحسب لمحمد أمين فهو الذي استطاع أن يخرج مني تلك الطاقات، لكن
برضه ما أنكرش إن أنا عمري ما جالي دور زي ده، الأدوار التي قدمتها من قبل
ماكنتش محتاجة تمثيل فقد كنت أبذل فيها طاقة بقدر المطلوب مني فقط، مش
معقول هعمل دور مش محتاج تمثيل وأقعد أخرج فيه كل الطاقات التمثيلية اللي
عندي عشان أنا عايزة أمثل، لكن الدور ده تحديداً كان عايز تمثيل بجد، من
أول مشهد لآخر مشهد، دي حياة كاملة لبنت عندها بلاوي ومصايب وأحساسيس
متداخلة ومشاعر.
·
بعد أربع سنوات من العمل كممثلة قدمتي الدور
الذي يخرج طاقاتك التمثيلية.. ألا تشعرين بأن هذا الدور تأخر قليلاً؟
- اتأخر؟!
بالعكس خالص ده جه بدري جداً في ممثلين بيعيشوا ويموتوا من غير ما يجيلهم
دور زي ده. أنا يادوب مابقاليش أربع سنين بمثل ده فعلاً جه بدري.
·
هل تطلَّب منك الدور مجهوداً مضاعفاً للتجهيز
له؟
- مش
مجهود مضاعف ولا حاجة، لكن أنا أول مرة في حياتي أجهز لدور، طول عمري بدخل
الاستديو وأشوف هيطلع مني إيه، لكن هذه المرة الأمر مختلف، أنا جهزت للدور
كويس قوي وقرأت السيناريو أكتر من مرة لأول مرة في حياتي، وأما كنت بقعد مع
صاحباتي خلال فترة تصوير الفيلم كنت بقول لهم «ما تتبتروش» علي النعمة أمال
لو حصلكم اللي حصل لحنان؟ أمال لو شفتوا حنان؟
·
ظهرت حنان في الفيلم وهي تفكر في الرجل علي
مدار أربع وعشرين ساعة وكأنها ليس لديها أي اهتمامات أخري سوي انتظار
العريس؟
- حنان
مرت بظروف صعبة مفيش بنت مرت بيها، من سفر أخيها ومرضها وابن عمها الذي
أصيب بالشلل، وخطيبها اللي سابها، فكانت عايزة تحس بالأمان والأمان بالنسبة
لها هو الراجل، فكانت بتفكر فيه حتي وهي نايمة في السرير، هي نفسها حد
يطبطب عليها، حتي لما راحت للدكتورة النفسية قالت لها أنا بدور علي الأمان
العاطفي. وعلي فكرة هي كان عندها اهتمامات تانية لكن ماكنتش باينة في وسط
أزماتها المتلاحقة هي مش كانت طالبة مثالية وموظفة مثالية؟ وكان عندها
أصحابها وبنت عمها وجارتها اللي بتحكي لهم عن همومها؟ يعني عندها حياتها،
هو بس شعورها بفقدان الأمان كان مسيطراً عليها طول الوقت.
·
كان هناك إحساس عام بالمرارة يسيطر علي كل
أحداث الفيلم وأبطاله.. هل سيطر عليك هذا الإحساس بسهولة رغم أنك لم تعيشي
تلك المعاناة في الحياة؟
- لقد كنت
أمر بحالة حزن أثناء تصوير الفيلم بعد وفاة والدي في ذلك التوقيت، وكانت
عندي حالة اكتئاب ساعدتني علي التعايش مع حالة المرارة التي يعيشها أبطال
الفيلم وبطلاته، أنا كانت عندي طاقة سلبية تخلصت منها في الفيلم، أنا بجد
طلعت كل اللي جوايا في الفيلم ده والحمد لله ارتحت شوية أول ما خلصت تصوير.
·
هل ستعودين لتقديم الأفلام الخفيفة مرة أخري
أم أنك ستختارين أفلاماً تحمل قضايا مهمة فقط؟
- أنا لست
ضد سينما الإيرادات، وأنا أكتر واحدة قدمت أفلاماً تافهة وأنا معنديش
اعتراض علي تقديم مثل هذه النوعية من الأفلام لأن هي التي صنعت وجودي في
السينما. أنا اسمي ونجوميتي أكبر من أعمالي لأنني قدمت أعمالاً فنية كتير
الناس لسه فاكراها، وطول ما أنا عندي ثقة في موهبتي مش هبطل أعمل أعمالاً
كوميدية.
·
ما العمل الفني الذي تعتبرينه أهم نقلة فنية
في مشوارك الفني؟
- أول عمل
غير وجهة نظر النقاد فيّ كان «حضرة المحترم أبي» خلاهم ينظرون لي بشكل
مختلف، أما «بنتين من مصر» فقد غير وجهة نظر الناس فيَّ بنسبة مائة
بالمائة. وفي ناس بتقول لي إحنا أول مرة نشوفك بتمثلي، زمان عندما كنت أسمع
حد من صحابي بيقول لي إني عملت دور مش عاجبه أو لما كنت أقرأ نقد ناقد كاتب
عني كلام مش حلو كنت بيني وبين نفسي بقول إنه بيضللني، لكن دلوقت أنا فهمت
إنهم ماكانوش بيقولوا كده عشان بيكرهوني كما كنت أتخيل، لكن عشان دي شغلتهم
وفهمت انهم كانوا خايفين عليّ.
·
ما الذي تغير بداخلك بعد تجسيدك دور حنان في
الفيلم؟
- اتغير
جوايا حاجات كتير، أهم حاجة أنني أصبحت مهمومة بتقديم أفلام تحمل رسالة
فنية تعبر عن الناس الغلابة والمطحونة، بصراحة أنا قبل الفيلم ده كنت شايفة
إن مفيش حاجة اسمها رسالة فنية وكنت بقعد اضحك علي اللي بيقولوا إحنا
عاملين فيلم يحمل رسالة كنت بقول رسالة إيه ده إحنا ممثلين يعني في الأول
ولا في الآخر، بس دلوقت أنا شايفة إن الممثل ممكن يقدم رسالة تغير الناس
وتخلي اللي حواليه يفكروا من جديد البنت اللي عندها 20 سنة هتفكر صح في
العريس اللي جايلها. الناس شافت بلاويها عن قرب، مشهد العبارة مثلاً،
الحكاية مش مجرد ناس بتموت غرقانة دي حالة عامة من الظلم والقهر دول مصريين
اتقتلوا علي إيدين مصريين. الناس دي شافت عيالها بتموت قدامها في قهر أكتر
من كده؟ الفيلم لا يتناول قضية العنوسة فقط، ده بيتناول مشاكل كتير موجودة
في البلد..البلد اللي مابقاش في خلاص منها غير إن الواحد يسيبها ويسافر
وياريت هيعرف يهرب ده القهر ممكن يطوله وهو بره البلد زي ما بيحصل للشباب
اللي بيغرقوا أثناء محاولاتهم الهجرة بطرق غير شرعية لأنهم مش لاقيين وسيلة
غيرها. وأما أنا أقول الكلام ده.. أنا اللي حياتي كلها مقضياها بين
استوديوهات التمثيل بقيت حاسة بالمرارة، أمال الناس المطحونة تقول إيه؟
·
هل الفيلم فقط هو السبب في تغيير طريقة
تفكيرك بهذا الشكل؟
- لأ فيه
ظروف خاصة مريت بها خلتني أتغير من جوايا، وأحس بمشاكل البلد والناس.. أنا
شعري شاب من اللي شفته، بجد كل حاجة حلوة جوايا راحت.
الدستور المصرية في
19/06/2010 |
