سعيد صالح هو أحد نجوم الكوميديا في الستينيات والسبعينيات.. خلال مشواره الفني مر بأزمات عديدة، لكنها لم تؤثر علي جماهيريته التي لا يختلف عليها أحد، وفي الوقت الذي يعرض له حاليا فيلم بالألوان الطبيعية، ويستعد لعمل فني ضخم علي مسرح الدولة بخلاف الأغنية التي يلحنها لمحمد منير، نراه يواجه شائعة الحجز علي أثاث شقته، من هنا بدأنا حوارنا مع سعيد صالح الذي لقبه الناس في السبعينيات بنجم الناس الغلابة، واعترف لنا بأسباب قبوله لأدوار صغيرة في أفلام هذه الأيام، وبصراحة قال رأيه في عادل إمام ومحمد صبحي، وتحدث أيضا عن أحمد حلمي وأحمد السقا، وأيام الشقاوة التي جعلت جمهوره يصدقه.

·         ما الحقيقة وراء خبر الحجز علي أثاث شقتك بالمهندسين، وكيف هي أحوالك المادية والمعيشية؟

- هذا الخبر كاذب وعارٍ تماما من الصحة، وقمت برفع دعوي قضائية علي الجريدة التي قامت بنشر الخبر لأنه لم يتم الحجز علي أي شيء، وكل عفشي وممتلكاتي زي ما هي واللي مش مصدق ممكن يتفرج عليها، والحكاية إن المنتج مدحت الشريف عرض علي مسرحية في سنة ١٠٠٢ اسمها عسل البنات، ووجدت أن المسرحية تحتاج إلي كثير من الشغل وتغيير أشياء كثيرة حتي تنجح مع الناس، وبالفعل قبضت منه ٠٢ ألف جنيه عربونا، وقمت بإضفاء التعديلات، لكن الموضوع لم يكتمل لأنني شعرت أنها مش هتنجح مع الناس، واعتذرت عن استكمالها، وبالفعل المسرحية تم إسنادها لناس تانية، لكنها قعدت أسبوعين وقفلت وفشلت فشلا ذريعا، وبعد كده سافر المنتج للخارج، ويبدو أن المحامي بتاعه كان عمال يشتغل علي القضية من وقتها إلي أن وصل المبلغ بتاع التعويض إلي مائة ألف جنيه، دي كل القصة، لكن مفيش حد حجز علي أثاث بيتي ولا الأدوات الكهربائية ولا حاجة، وأنا عندي استعداد إني أرجع مبلغ العربون، لكن لما يرجع الراجل ده فلوس كل الناس الغلابة اللي أخدها! وأحوالي المادية بخير وعندي بدل الشقة اتنين وبدل العربية اتنين وفلوسي موجودة والحمد لله! 

·         أين سعيد صالح الآن؟

- أنا موجود باشتغل الشغل اللي بحبه، أقوم بالتلحين والغناء لكبار الشعراء في مصر والعالم العربي وده كان موجود في مسرحياتي مثل كعبلون وشرم برم وأبونضارة وقعدين ليه وحلو الكلام كل الأغاني في المسرحيات دي بتاعتي، ومن ألحاني ومازلت مستمرا، كل ما أجد كلام حلو لفؤاد حداد أو أحمد فؤاد نجم أو بيرم التونسي أقعد ألحنه وأغنيه وأسجله علي شرايط عندي علشان أقوله في مسرحياتي المقبلة. 

·         هل هناك عمل مسرحي جديد تقوم بالتحضير له؟

- نعم، اتفقت مع أشرف زكي إني سأقدم علي مسرح الدولة رواية لـ فؤاد حداد اسمها مونة المحاياة، وهي رواية خيالية بها الكثير من الإسقاطات علي الواقع بتاعنا.

·         والسينما؟

- في داخلي بطلت سينما منذ ٢٨، وأقصد السينما اللي بحبها وعاوزها بعد كده، كل الأدوار الصغيرة التي قدمتها في السينما مع أصحابي مجاملة أو مع شباب أقوم بتشجيعهم بالاشتراك معهم في أفلامهم، حاليا يعرض فيلم بالألوان الطبيعية طالع ضيف شرف في دور مدرس بكلية الفنون الجميلة، وقبلت الدور علشان باحب هاني فوزي. 

·         آخر مسرحياتك مسرحية قعدين ليه التي استمرت علي مسرح الدولة ما يقرب من الأربع سنوات هل تم تصوير المسرحية للتليفزيون؟!

- طبعا لأ، زيها زي أغلب مسرحياتي دائما هناك رقابة ولأنني جريء وباقول اللي أنا عاوزه مسرحياتي منبوذة من التليفزيون والقنوات الفضائية، يعني في مسرحية قعدين ليه كنت باهجم كل مسئول مازال يجلس في منصبه ولم يقدم أي شيء للبلد.

ورغم أن المسرحية استمرت طوال فترة عرضها كاملة العدد في مسرح الدولة إلا أن هيئة المسرح رفضت أن يتم تصويرها للتليفزيون رغم أنها نجحت جدا مع الناس، وده نادر أن يحدث علي خشبة مسارح الدولة، لكن الحقيقة مسرحياتي منبوذة لأنها لا تعجب الرقابة! 

·         معروف عنك أنك تخرج دائما عن النص وهذا ما يسبب لك المشاكل ومن ضمنها دخولك السجن ,٢٨٩١. ما تعليقك؟

- هيه الناس فاهمة إن المؤلف هو اللي بيألف المسرح، لأ، نجم العمل هو من يضع الحوار وأتحدي أن يكتب مؤلف مسرحية يستطيع بها إضحاك الناس دون أن يضع النجم لمساته وكلامه وإيفيهاته علي النص، يبقي نص إيه اللي باخرج عليه؟! طب في مسرحية مدرسة المشاغبين كنت أنا وعادل إمام والمشاركون في المسرحية كنا كلنا بنألف الحوار ساعدنا في ده إن إحنا كنا أصحاب، وبعدين ما هو وقت عرض مسرحيات المشاغبين والعيال كبرت قعدت الرقابة والنقاد يقولوا إنها مسرحيات خارجة عن النص، النهارده بتتعرض علي كل قنوات الدنيا والناس حفظتها، وهذه المسرحيات كانت بتنتقد كل شيء بواقعية وصرامة، يعني في مسرحية العيال كبرت، كنا بنتكلم عن دور الأب في العائلة الذين هم أهم من أي فلوس، أبويا الله يرحمه كان رجلا بسيطا موظفا، لكن قدر يربي ولدين وتلات بنات من عمله كموظف في شركة البوتاجاز!

عاوز أقول إن الفنان لا يمشي ع الخط، والفن من المستحيل أن نوجهه كما يريد الذين يخافون من النقد ولولا جرأة مسرحيات المشاغبين والعيال كبرت، لما كان أبطالها هم نجوم المسرح والسينما في الستينيات والسبعينيات. 

·         مسرح التليفزيون قدم كثيرا من النجوم أين هم الآن؟

- من يومين قابلت رئيس اتحاد الإذاعة والتليفزيون م. أسامة الشيخ وقلت له إزاي إنتم غافلين عن دعم النجوم اللي كان موجود من أربعين سنة، وقلت له اعمل مسرح واكتشف كوادر من ممثلين ومهندسي إضاءة وديكور ومخرجين، والحقيقة اقتنع بهذه الفكرة واتفقنا هنعمل شغل مع بعض، والحقيقة هذا الرجل أنقذ التليفزيون المصري من الخراب يعني دلوقتي فيه كمية إعلانات معمولة علي قنوات النايل، كمان أتاح مشاهدة الكورة لكل الناس بعدما كانت حكرا علي قنوات عربية أخري، كل ده نجاح، وعموما هذه هي فكرتي وأنا مستعد للمساعدة حتي نكتشف كل المواهب التي لا تجد سكتها أو طريقها. 

·         من أطلق عليك لقب نجم الناس الغلابة؟!

- الناس اللي حبوني هم من أطلقوا علي هذا اللقب، كان مسرح سعيد صالح من القطاع الخاص من أكثر المسارح التي تحقق النجاح، الشعب العربي كله عرف سعيد صالح إنه واقف مع قضايا الناس والأمة، في بدايتنا أذكر أن منتجا لبنانيا شاهد مدرسة المشاغبين وبعدين اتفق معانا هنروح بيروت ونعرض المسرحية خمسة أيام، لكن الحقيقة من شدة النجاح المسرحية استمرت سبعة أشهر كاملة العدد ورغم أن المسرحية اتعرضت في سنوات النكسة إلا أن الشعب العربي كله عرف إن مصر دي قوية وصامدة ومازالت لها الريادة من شغلنا. 

·         بدأت مع الزعيم عادل إمام لكن سعيد صالح اليوم لا يحظي بنفس نجومية الزعيم.. ما تعليقك؟

- عادل يستاهل ما وصل إليه، وبعدين أنا مش مهم عندي ولا يزعلني أنا إيه النهارده، الناس ستعلم قيمتي الحقيقية بعد سنوات طويلة لأني سأترك تاريخا من الفن ما يقرب من ٠٠٥ فيلم وأربعين مسرحية وعشرات القصائد التي قمت بتلحينها وغنائها لفؤاد حداد وصلاح جاهين وبيرم التونسي ونزار قباني. 

·         إذن لم يندم سعيد صالح علي أي شيء في حياته، وهل دخولك السجن كان عثرة في استمرارية نجوميتك؟

- لأ، أبدا، أنا مش زعلان ولا ندمان، أول مرة دخلت فيها السجن كانت ٧١ يوم بسبب خروج عن النص، والمرة الثانية ٦٩٩١ وقالوا كان معايا حتة حشيش وعاوز أقول إني قعدت سنة في السجن خلالها تغيرت تماما عن سعيد صالح الشقي الذي كان بيعمل كل حاجة في الحياة كنت أشقي ممثل، لكن قابلت واحدا في السجن كان محكوما عليه بالمؤبد، ومازال صديقي حتي اليوم وتعلمت منه كيف أتقرب من الله، خرجت بعدها شخصا مختلفا وقمت بالحج ٤١ حجة لغاية السنة اللي فاتت، وأصبح هناك كثير من الأشياء لا تهمني، وبقيت بانظر لأمور كثيرة بشكل مختلف من قبل، أعترف أني لم أركز في التمثيل فقط، لكن كنت مزيكاتي ومغنواتي وممثل وأنا مبسوط بده، أول ما غنيت لنزار قباني كانت قصيدة صغيرة عن مراته وبعدين غنيت لصلاح جاهين الذي استفزني وقال لي لو معلم غني لفؤاد حداد، وبالفعل لحنت كلامه وغنيته كنت كل ليلة علي خشبة المسرح أغني ما يقرب من عشرين لحنا من تأليفي، خلال المسرحية باقول كل حاجة. 

·         هل يوجد مسرح اليوم؟

- لأ، مفيش مسرح إلا مسرح فرقة الفنانين المتحدين، مسرح سمير خفاجة ربنا يشفيه من مرضه، هو اللي طلع كل نجوم المسرح طوال السنين اللي فاتت. 

·         أي مسرح أقوي مسرح عادل إمام أم محمد صبحي؟

- باتفرج علي مسرح الاتنين، لكن باضحك مع عادل إمام، لكن صبحي الضحك مش كتير، فنه فلسفة ذاتية.

·         هل مسرحك مختلف؟!

- طبعا، أنا اهتممت بالناس ولم أحسب للفلوس حساب عشان كده كان مسرحي جريئا وما بخافش من حد، كل اللي يهمني مصلحة البلد. 

·         زميلك في المشاغبين يونس شلبي توفي بعد صراع مع المرض وضيق في الفلوس وكذلك سيد زيان ماذا يحدث للنجوم بعد سنوات من التألق والمكسب ولماذا تكون النهاية مريرة؟

- ربنا يرحمهم الاتنين وعاوز أقول الاتنين جمعوا فلوس كتير وماتوا وعندهم فلوس، لكن هم الاتنين ما كانوش بيهمهم الاستمتاع بالحياة قد ما كان بيهمهم الحفاظ علي الفلوس وجمعها!.. وربنا يرحمهم. 

·         وأنت استمتعت بحياتك؟!

- جدا، أنا لفيت الدنيا كلها واتفسحت وعملت كل حاجة ممكن تسعدني. 

·         اتجوزت كام مرة؟!

- مرتين، الأولي خلفت منها بنت معروفة جدا وهي المونتيرة هند سعيد صالح وتعمل في التليفزيون، والثانية زوجتي شيماء معي الآن. 

·         هل تشعر أن سنوات الشقاوة كانت سببا سلبيا علي حياتك؟!

- بالعكس لو ما كنتش شقي ما كانش الناس صدقتني في مسرحيات زي المشاغبين والعيال كبرت، أنا كنت باقدم شريحة عريضة من شباب هذه الفترة. 

·         عندما يأتي فيلم لك علي إحدي القنوات هل تجلس وتشاهده؟!

- نادر جدا، يعني أشوف لقطتين وأقلب. 

·         ليه؟!

- لأن السينما عندنا عبيطة شوية! 

·         حتي الشغل بتاعك؟

- آه، يعني أحلي حاجة في حياتي عملتها علي خشبة المسرح، لكن ليس كل أفلامي التي قدمتها باحب أشوفها ما عدا سلام يا صاحبي والمشبوه والأفلام اللي عملتها مع رمسيس نجيب، لكن الباقي كان استرزاق وفلوس! 

·         مين أكتر نجوم شباب بتحب تتفرج عليهم؟!

- أحمد السقا بحبه جدا، وكريم عبدالعزيز لأنه مثل معايا وهو صغير في المشبوه وبيضحكني محمد هنيدي ومحمد سعد اللي كانت بداياته معايا علي المسرح، أما أحمد حلمي فدخل إلي النجومية بهدوء وباتت له مساحة خاصة به بعدما كان بيقدم برنامج عبقري مع الأطفال عرف إزاي يوصل للناس وبعدين ما بحبش أفلام خالد يوسف لأنه بيبالغ في إظهار الحاجات الوحشة في البلد.

·         بتلحن إيه دلوقتي؟

- اتفقت مع محمد منير إني ألحن له أغنية لأحمد فؤاد نجم وهتكون قنبلة ما حصلتش.

صباح الخير المصرية في

29/12/2009